-
شو
بالنسبة للشباب الي كل ما بيجتمعوا لازم يحكوا كل كلمة وسخة و كل مسبة من تحت
الزنار بالدنيا ... يا حرام بتلاقي شاب معاه دفتر فيه كل المسبات الوسخة و قاعد
بيعمل تراك (تتبع) لاي مسبة ما انحكت ... بتلاقي الشاب بدو يروح على داره فبيقوله
: "عفوا , بس لسه في تلات مسبات انت لسه ما حكيتهم : **** و ******* و *****
. طبعا الشاب بيحس بالاحراج عن الغلط الشنيع الي عملو و بيحط المسبات بتلات جمل
مفيدة و بعد هيك بيروح.
-
و في قعدات
شباب بتلاقي شاب قاعد عم يرتعش و يحك بحالو ( لا , لا , مش جرب و لا ادمان ) بتسال
الشاب شو في؟ بيقولك هادي قعدة شباب و مش
قادر اسب لانو الموضوع مش سامح ... و هادي
معضلة , بيكون الموضوع عادي متل : شو اكلت امبارح ؟ .. بيقوموا الشباب ( و من باب
التعاطف) بيفتحوا مواضيع السياسة و البنات و المواضيع الصعبة عشان يساعدوه يسب و
الا ممكن الموضوع ياثر على قدرته الانجابية بالمستقبل !!
-
لعلمكم :
الفكرة مش انكم تكونوا محترمين قدام البنات و بين بعض الوساخة و الدشارة اشي عادي
, لانو الشاب الوسخ قدام الشباب بيكون تفكيره وسخ لما يكون بين بنات .
-
ملاحظة (
سيتم الاستفادة منها بالنقطة الجاية) : ما بعرف ليش الا انو المسبة او الكلام
الوسخ باللغة الانجليزية بتحسها اخف بكتير من العربي
-
شو
بالنسبة لبعض (قولنا بعض , يعني نسبة قليلة ) البنات الي ( اكيد من باب انهم
متحضرين و ياي ) بيسبو و بشكل علني و على السوشال ميديا , بالاول كنا نسمع او نقرا
اكم من كلمة بالانجليزي , مبلوعة , بعدين
بطل فيها ,, صرنا بالعربي يا معلم و مش من
تحت الزنار , من فوق و تحت و من الزنار نفسه
...
-
لعلمكم :
بعد التاكيد على تاييدي لحرية المراة و استطاعتها فعل كل شي و كل الكلام الكبير ده
يا مرسي , كتير عيب (ركزو على كلمة عيب ) لما بنت متعلمة لطيفة حلوة و بنت عيلة تحكي هيك كلام ,, مش تحضر و مش حرية
,, هادي قلة حياة يا حبايبي :)
على فكرة , كل شخص
فينا بيطلع منو كلام طالع نازل بموقف معين , بس انا عم احكي عن الناس الي طول
الوقت بتعمل هيك.
-
شو
بالنسبة للناس الي بتحس انهم تعينوا عشان يصدروا حكام على تصرفات و اخلاق البشر الي حواليهم (
مين عينهم ؟؟ لسه البحث جاري ) و بيقولوا فلان منيح و فلان عاطل , و الاسوا
التلميحات ( يا الله ما اسواها من عادة ) عن تصرفات الاخرين و سلوكياتهم .
-
لعلمكم
:المشكلة انو هم , و انا عم احكي من تجربة
شخصية مع ناس كتير قراب مني , بيكونوا
بيعملوا اغلاط كتييييرة بس الفرق انو مش الكل بيعرف فيها , فخليهم ( كملائكة طبعا)
يحكموا و يستهزئوا (ركزوا على يستهزئوا ) , طب روحوا شوفو البلاوي السودا الي
بتغضب ربنا الي بتعملوها بعدين تعو احكو ...
-
شو
بالنسبة للناس الي بتحكي عن الدين بطريقة منفرة , كل شي غلط و حرام و ممنوع ,
و كتير من حديثهم بتحسوا انتقادات و كلام
قاسي ... ما ظنيت انو الرسول عليه افضل الصلاة و السلام كان يحكي بهادا الاسلوب
الحاد , ( اكيد في ناس حتقولي انت عم
تقارن ناس عاديين بالرسول –ص- ) اكيد لا , بس الفكرة انو هادول الناس بدهم يانا
نكون على مراتب عالية , يعني لو الواحد قال : انا تعبت و مش قادر اتحمل , بيقولولك
: شوفو قديش اتحمل الرسول و الصحابة
(هادول الرسول و الصحابة , يعني اشرف ناس, و احنا ناس عاديين , عم تقارننا
فيهم !!!! بعدين حرام الواحد يقول انا تعبان و مضغوط !!! )
-
لعلمكم :
في ناس , و كردة فعل للطريقة القاسية الي بتحكوا فيها عن الدين , بتصير بتجادل
لمجرد الجدال , مع العلم انو بيكونوا عارفين انو المقصد من فكرتكم الاساسية خير,و
مقتنعين بالفكرة الاساسية , بس يا ريت توصلو
فكرتكم ( و خاصة لما تكون عن الدين ) باسلوب هادي و لطيف و واعي, و بالاخص لما
نكون عم نحكي مع مراهقين او ناس صغيرة بالسن زي طلاب الجامعات الي لسه عم يتعلموا
شو الصح من الغلط ( على فكرة انا لسه بهادي المرحلة و في كتير اشياء ما بعرفها )
-
ملاحظة
جانبية : يا الله شو بحب اسلوب برنامج خواطر , و الي على الرغم من انو مش برنامج
ديني بالمقام الاول ( او المتعارف عليه) , الا انه بيعلمنا كتير اشياء عن ديننا
بطريقة حلوة و بسيطة و جميلة بخليك تحس حالك بني ادم (ركزوا على بني ادم ) لازم
تسال حالك كيف ممكن اكون اقرب من ربي و تصير تشتغل على حالك .
-
شو
بالنسبة للناس الي بتحسها بس عم تحاول انها تلفت انتباه الها , يعني بتلاقيهم
حاطين على الفايس بوك : كل عيلتي عم تموت هلا !! , و انا قصدي الناس الي عنجد بيكونوا attention seekers ما
بتحس عندهم صدق ,,, بصراحة عندي نظرية بخصوص هادي القصص ( و انا على شبه يقين اني
غلطان بس لازم احكيها, ما في اسهل من الحكي , و اذا انتو وصلتو لهادا الجزء من فشة
الخلق يعني انتو ناس فاضية اشغال و ما في وراكم شي , يعني انطموا و اسمعوا – طبعا
شكر كبير لانكم عم تقراوا يا حلوين <3 <3 <3 ) اذا انت نشرت القصة
الحزينة على الفايس , معناتو انها اقل
خطورة و حزن مما هي عليه في الحقيقة ,,,
تخيلو الموقف . الدكتور : عملنا كل شي بنقدر عليه بس للاسف المريض مات . حبيبنا \
حبيبتنا ( ينظر متلفتا يمين و شمال بحثنا
عن شيء ) . الدكتور : اذا حابب تبكي مش غلط , البكاء ظاهرة صحية و .... , يقاطعه
حبيبنا : لا , بس عم ادور على الجوال عشان انشر خبر الوفاة على الفيس و بعدين ببكي
,,, GIVE
ME A “lovely” break !!
-
لعلكم :
الناس مش اغبياء , و بيحسوا بصدق الي عم ينكتب , اول مرة بتعدي , تاني مرة بتعدي
بس بعد هيك ما حد بتفرق معو !!! بعدين يا جماعة انتو هيك بتقللو من قيمة حالكم !!
خلينا نختم بموضوع خفيف و اله علاقة بشبابنا ( العتاولة الابطال
الزلام ) :
-
شو
بالنسبة لما الشاب يروح على محل ملابس و تكون غرفة القياس مشغولة و يكون الشاب بدو
يقيس بنطلون , و يقولو صاحب المحل : " عادي , قيسوا هان , ما انت زلمة !! و
الي عندك عنا !! " - لولا اني عاطي
محاضرة عن المسبات لكنت حكيت مسبة كبيرة تصلح لهازا – مش هاذا – الموقف اللطيف .
-
لعلمكم: كون
الشاب زلمة ما بيعني انو ما عندو خجل او حياء !!! , و نظرية تانية : هو محلات
الشباب مقتصرة فقط عليهم !! ما في بنات و ستات بيشتروا لاخوتهم و ولادهم و جيزانهم
,,, تعبت نفسيا انا !!!
وعد , وعد , هادي اخر نقطة :
-
ليش لما
بعض الناس بيحاولوا يهينو زلمة بيقولوا عنو "مرا " .. هادا بيعكس عدم
احترامهم للسيدات , لامهاتهم و اخواتهم البنات و بناتهم . استخدامك كلمة
"مرا" كاهانة هو اهانة لكل ست بحياتك !!!
شو رايكم ؟؟؟
0 التعليقات