Tuesday, May 27, 2014

فشة خلق (1) : شو بالنسبة .... ؟ مجرد افكار بالعامية


شو بالنسبة للناس الي بتنشر صور اطفالها , صور اخر ما يمكن وصفها  انه طفولية او فيها براءة , غير الماكياج و اللبس في موضوع الطريقة الي بيعلموا الاطفال يوقفوا فيها قدام الكاميرا ... جوليا بطرس تنادي و تقول "أين الطفولة؟؟"

شو بالنسبة للناس و خاصة البنات الي بياخدوا صور لرجليهم مع بعض و بيحطوها على الفيس و بعدين بتلاقي حدا معلق "منورييين " , (نذكركم بحملة "خنقتونا"  الي بدات من السنة الماضية و مستمرة حتى القضاء على كل من يرتكب هذه الافعال الشنيعة )

شو بالنسبة للبنات الي ما بيحطوا صورهم على الفيس بووك من باب الالتزام و التدين و بتلاقيها معبية البروفايل تبعها صور مغنيات و ممثلات  (Excuse me !!!)  

شو بالنسبة للاطفال الي بيكون عمرهم اقل من 12 سنة و اساميهم على الفيس بوك : صمت الغروب, سمكة الاحزان , غبائي سر كبريائي . (الناس في الشارع تنادي و تقول : ارحموووونا)

شو بالنسبة للناس الي بتنتقد الاخرين على نفس العيوب الي عندهم ياها , و بتحسهم بيحكوا بدم حامي كمان (يعلن محل بيتنا للمفروشات عن مراية بلاش لكل واحد من هادول الاشخاص )

شو بالنسبة للبنات الي بيكتبوا حرف القاف "ئ" عشان يورجو انهم متحضرين و ناعمين و الشباب الي صاروا يكتبوه "ج" عشان يورجو انهم رجال !!! حرف القاف لازم يكتب قاف , ( اللغة العربية تستنشد باصحاب القلوب الجوية – قوية- و صاحبات القلوب الرئيئة –الرقيقة- )

شو بالنسبة للشباب الي صاروا يتصوروا و عاملين ال Duck face ؟

شو بالنسبة للناس الي بتحط صورة الها و بعدين بتبعتلك رسالة على الخاص و بتقول "يا ريت لايك" .. في حال في ضعف باللغة خلوني اشرحلكم شو يعني كلمة  "لايك" , الكلمة معني احب او اعجب بي , و لما تضغط على الزر معناه انو الاشي عاجبك , خلو الناس تشوف و تحكم لحالها , و المصيبة انو الصورة بتكون شخصية ما الها أي هدف (هذه الجملة برعاية مركز "علمني" للغات, اول دروة ببلاش )

شو بالنسبة للناس الي متخيلة انو انت بتفتح اكونت الفيس بووك و ما تعمل شي بس انك تنتظر انهم يحكو معك عشان ترد سريعا , و اذا ما رديت بيعملوا حوار مع حالهم و بتخلص القصة بزعل انت ما الك علاقة فيه من اساسا , اولا مش كل مين كان اون لاين معناها فاضي , و تانيا "Seen"  ممكن يكون معناها انك فاتح النت و قايم من جنبو , ما بتصير؟ بتصير !! (جمعية GET A LIFE تعلن عن اغلاق باب الانتساب بسبب الكم الفائض من الطلبات )

شو بالنسبة للناس الي اول ما تعمل لايك بتكتبلك على الخاص , يعني نظام "مسكتك" (نكرر : جمعية GET A LIFE تعلن عن اغلاق باب الانتساب بسبب الكم الفائض من الطلبات )

و شو بالنسبة للناس الي اول ما تشوفك حاطط بوست على الفيس بيكون ردة فعلها : انت كاتب هيدا الشي عني , صح ؟ او لما تشوفك حاطط اغنية : انت بقصة حب عنيفة !!! ( ممكن حد يترجم هادا الجملة بالصيني : يعلن فرع الصين لجمعية GET A LIFE عن اغلاق باب الانتساب في جميع الافرع بسبب الكم الفائض من الطلبات)

و شو بالنسبة الكم , ما عندكم شي حابين تقولوه ؟؟؟


No comments:

Post a Comment

About Me

Palestinian/ Freelance writer, translator and Trainer./ I believe that writing is therapy and that is why I write./ 26 years old.
Designed ByBlogger Templates